ARZUWYMYŇ HASYLY
592 Berkarar döwletiň täze eýýamynyň Galkynyşy döwrüniň «Pähim-paýhas ummany Magtymguly Pyragy» ýylynyň her bir güni guwandyryjy wakalara beslenýär. Häzirki ajaýyp döwrümizde maksatlar myrat tapýar. Bu ýyl meniň üçin hem guwandyryjy, şatlykly ýatdan çykmajak ýyllaryň biri boldy. Alypbaryjy bolmak islegi bu ugurdan ussat bilim aljak talyp bolmak bagty bilen utgaşdy. Bu ýyl maňa Türkmen döwlet medeniýet institutynyň talyby bolmak bagty miýesser etdi. Muňa buýsanjymyň çägi ýok. Hormatly Prezidentimiziň durmuşa geçirýän özgertmelerinde ýaşlaryň döwrebap hünärleri ele almaklary, döredijilikli ylmy-gözleg işleri bilen meşgullanmaklary, sanly tehnologiýalary özleşdirmekleri bilen baglanyşykly wezipeler aýratyn orun eýeleýär. Talyplyk ýyllarymyz hem iň bir ýatda galyjy pursatlary bilen ömrümize öwüşgin çaýar. Geljekde ukyp-başarnygymy, bilim derejämi artdyryp, bar ünsümi saýlap alan hünärimi kämilleşdirmäge gönükdirmek isleýärin. Watanyň geljekki ykbalyny bize – ýaşlara ynanýan Milli Liderimiz Gahryman Arkadagymyz, Hormatly Prezidentimiz Arkadagly Gahryman Serdarymyz okamaga, öwrenmäge ähli şertleri döredip berdi. Diýmek, bize diňe ýeňişli menziller garaşýar.
Nusga edip Arkadagyň pähimini,
Güllederis ýurduň oba-şäherini,
Bagt mukama öwrüp, Watan waspyny
Biz – bagtyýar döwrüň bagtly talyby.
Biz – ýaşlara asuda döwletde bolelin durmuşda ýaşap okamaga, döretmäge berýän giň gerimli mümkinçilikleri üçin türkmen halkynyň Milli Lideri Gahryman Arkadagymyza, ýurt baştutanymyz Arkadagly Gahryman Serdarymyza ýaş talyp ýüregimizden köp sag bolsun aýdýarys. Bagtly döwrüň bagtyýar talyby hökmünde biz hem özümize ynanylan bu ynamy ödemek üçin Watana we bilim ojagymyza wepaly talyp ýaşlar bolup, hemişe watansöýüjiligimiz bilen il-ulsumyzy, bize uly ynam bildiren halypalarymyzy, hormatly mugallymlarymyzy begendirmäge çalşarys.
Göwher ORAZDURDYÝEWA,
Türkmen döwlet medeniýet
institutynyň 1-nji ýyl talyby.
