Institutymyzyň täzelikleri

TÄSIRLI GEÇEN DERS BÄSLEŞIKLERI

Ýurdumyzyň ýokary okuw bilim bermek ulgamyny özgertmek
ýurdumyzda alnyp barylýan döwlet syýasatynyň esasy ýörelgeleriniň biridir.
Şeýle özgertmeleriň maksady ýokary okuw mekdepleriniň derejesini ýokarlandyrmak
bilen baglanyşykly bolup, bu ýokary okuw mekdepleriniň halkara derejesindäki
eýeleýän ornuny pugtalandyrmaga hem täsirini ýetirýär. Soňky ýyllarda halkara
ders bäsleşiklerine gatnaşýan talyplaryň sany artýar, talyplar şol
bäsleşiklerde  üstünlik gazanýarlar. 2024-nji
ýylyň noýabr aýynda Halkara ynsanperwer ylymlary we ösüş uniwersiteti
tarapyndan filosofiýa dersi boýunça  «A»
we «B» derejelerde geçirilen I Halkara olimpiadasy hem şoňa mysaldyr. Bu
olimpiada institutymyzyň talyplarynyň ýedi sanysy gatnaşyp, olaryň bäş sanysyna
bürünç medala eýe bolmak bagty miýesser etdi. Şol talyplaryň arasynda
bolmagymyz bizi örän buýsandyrýar. 

Bäsleşikde ýeňiş gazanmak hemişe-de aňsat düşmeýär. Şonuň
üçin bize filosofiýa dersi boýunça mugallymlarymyz – filosofiýa ylymlarynyň kandidaty
D.Babaýew, institutymyzyň uly mugallymy G. Karaýewa, şeýle hem institutymyzyň jemgyýeti
öwreniş ylymlary kafedrasynyň müdiri  B.
Annabaýewa ýakyndan ýardam berdiler. Sowal-jogap alyşmak esasynda, biz
filosofiýa dersi boýunça bilimlerimizi yzygiderli kämilleşdirmäge çalyşýarys.
Sebäbi filosofiýa hem iň gyzykly dersleriň biridir. Şeýle bäsleşiklere gatnaşyp,
biz bilimlerimizi has-da taplaýarys, ýeňiş gazanmak üçin tijenmegiň gerekdigine
düşünýäris.

Ýurdumyzda talyp ýaşlaryň ýokary hilli bilim almagy üçin
döredilýän şertler bizi buýsandyrýar. Täze ýyl baýramçylygynyň öňüsyrasynda
gazanan bu ýeňşimiz bize uly sowgat boldy. Şeýle-de talyp deň-duşlarymyz
Türkmenistanyň taryhy, ekologiýa, iňlis dili we beýleki dersler boýunça halkara
we döwlet derejesindäki ders bäsleşiklerinde ýeňiji boldular. Bu ýerde ýokary
işjeňlik görkezen halypa mugallymymyz Enebaý Garajaýewa Türkmenistanyň Bilim
ministrliginiň Hormat haty bilen sylaglandy.

Garaşsyz Watanymyzda ýaşlaryň geljegi barada uly aladalar
edilýär. Şonuň üçin hormatly Prezidentimize, türkmen halkynyň Milli Lideri
Gahryman Arkadagymyza hemişe uly sagbolsun aýdýarys. Goý, olaryň janlary sag,
belent başlary dik bolsun!

Täçjemal AGAÝEWA,

Türkmen döwlet medeniýet institutynyň  

4-nji ýyl talyby,

filosofiýa dersi boýunça

I Halkara ders bäsleşiginiň ýeňijisi.